ශ්රී ලංකාවේ ඩිජිටල් මූල්ය යටිතල පහසුකම් යාවත්කාලීන කරමින්, අතථ්ය වත්කම් සේවා සපයන්නන් (Virtual Asset Service Providers - VASPs) සඳහා විධිමත් සහ ශක්තිමත් නියාමන රාමුවක් සකස් කිරීමේ අරමුණින් පැවැත්වෙන 5 වන අනුකාරක සභා රැස්වීම ගරු, ඩිජිටල් ආර්ථික නියෝජ්ය අමාත්ය ඉංජිනේරු එරංග වීරරත්න මහතාගේ ප්රධානත්වයෙන් අද (10) දින ශ්රී ලංකා මහ බැංකු පරිශ්රයේදී සාර්ථකව පැවැත්විණි.
ජාත්යන්තර ප්රමිතීන්ට අනුකූලව ශ්රී ලංකාව තුළ VASP ක්ෂේත්රය අධීක්ෂණය කිරීම, නියාමනය කිරීම සහ අනුකූලතා පද්ධති ශක්තිමත් කිරීම කෙරෙහි මෙහිදී ප්රධාන අවධානය යොමු විය.
මෙහි විශේෂ අංගයක් ලෙස, අතථ්ය වත්කම් සේවා සපයන්නන් සඳහා අදාළ වන මූල්ය කාර්ය සාධක බලකායේ (Financial Action Task Force - FATF) ජාත්යන්තර ප්රමිතීන් පිළිබඳ විශේෂ තාක්ෂණික සහායක සැසියක් ද පවත්වන ලදී.
එක්සත් රාජධානියේ HM Treasury ආයතනය නියෝජනය කරමින් පැමිණි ක්ලෙයාර් විල්සන් සහ හැලා නජ්ජාර් යන මහත්මීන් විසින් මෙහෙයවන ලද මෙම සැසියේදී, ගෝලීය VASP නියාමන අත්දැකීම්, FATF හි ප්රධාන නියාමන අපේක්ෂාවන් සහ ශ්රී ලංකාවට වඩාත් ගැලපෙන නීතිමය හා අධීක්ෂණ රාමුවක් සකස් කරගැනීමේ ප්රායෝගික ප්රවේශයන් පිළිබඳව දීර්ඝ ලෙස තොරතුරු ඉදිරිපත් කෙරිණි.
මුදල් විශුද්ධිකරණය සහ ත්රස්තවාදයට මුදල් සැපයීමට එරෙහි (AML/CFT) ආරක්ෂණ ක්රමවේද නංවාලමින්, ශ්රී ලංකාවේ VASP නියාමන රාමුව ජාත්යන්තර මට්ටමට ගෙන ඒම උදෙසා තැබූ තීරණාත්මක පියවරක් ලෙස මෙම සාකච්ඡාව හඳුන්වාදිය හැකිය. නිරන්තරයෙන් වෙනස් වන ගෝලීය තාක්ෂණික හා මූල්ය ප්රමිතීන් සමඟ ශ්රී ලංකාවේ ඩිජිටල් ආර්ථිකය ඒකාබද්ධ කිරීම මෙහි ප්රමුඛ අරමුණයි.
මෙම අවස්ථාවට ඩිජිටල් ආර්ථිකය පිළිබඳ ජනාධිපති ජ්යේෂ්ඨ උපදේශක, ආචාර්ය හාන්ස් විජයසූරිය මහතා, ඩිජිටල් ආර්ථික අමාත්යාංශ ලේකම්; වරුණ ශ්රී ධනපාල මහතා , ශ්රී ලංකා මූල්ය බුද්ධි ඒකකයේ අධ්යක්ෂ ආචාර්ය සුභානි කීර්තිරත්න මහත්මිය ඇතුළුව රාජ්ය හා මූල්ය ක්ෂේත්රයේ ප්රමුඛ ආයතන නියෝජනය කරමින් නිලධාරීන් රැසක් එක්ව සිටියහ.
